È finito

Chega o final do curso e, aínda que satisfeitos e satisfeitas, estamos un pouco tristes por rematar. Nesta última sesión traballamos coa creación e edición de vídeos e cancións axudados da IA.

Para iso, saímos polas rúas de Florencia e gravamos o que foi para nós o mellor da semana.

           

Despois, xa de volta na escola, editamos o vídeo final por grupos para amosalo na clase.

Finalmente, antes da despedida e da entrega de diplomas, creamos unha canción coa aplicación Suno a modo de despedida. Que marabillosa experiencia e canto aprendemos!! 💗💗

Venerdì

Estamos chegando ao final da formación e xa nos sentimos todos e todas moito máis cómodos co emprego das ferramentas que traballan coa IA.

Hoxe pasamos boa parte da mañá traballando con Brisk teaching. Trátase dunha extensión de Google Chrome que case ninguén de nós coñecía, pero que nos pareceu fascinante para o mundo educativo!! 💻 

Estivemos explorando as súas diferentes funcionalidade e creamos preguntas a partir dun vídeo, adaptamos textos ao nivel desexado... O resultado foi rápido e incrible! Incluso permite crear podcasts a partir dun tema! 😍😍

E despois da sesión de traballo coa IA, pola tarde tivemos unha formación de cociña italiana! Elaboramos a nosa propia pasta fresca, dúas salsas para acompañala e xeado! 🍝🍨

Andare avanti.

Comezamos o cuarto día cunha actividade no patio da escola para activarnos física e mentalmente. Despois deses cinco minutos iniciais, a verdade é que nos atopamos con máis entusiasmo para continuar coa formación. 😁😃

A mañá transcorreu de xeito rápido, porque fomos empregando diferentes aplicacións para crear actividades para a aula. Despois de coñecer Goosechase onte, hoxe deseñamos unha actividade propia vinculada á nosa materia para desenvolver co noso alumnado.

Despois diso, traballamos con Quizizz, unha aplicación que xa coñeciamos moitos de nós, pero que non sabiamos que incorporaba a IA. Fixemos inicialmente un como "alumnado" mediante a opción de "Resposta con papel" e empregando as imaxes como as que podedes ver na foto.

Despois, deseñamos o noso propio Quizizz axudándonos da IA e puidemos comprobar que os resultados que ofrece son bastante bos!

Rematado isto, exploramos a web de Magic School e todas as súas ferramentas (creación de presentacións, corrección de textos, creación de cancións, creación de preguntas a partir de vídeos de Youtube...). Finalmente, estivemos explorando a aplicación de Google Arts and Culture e "xogamos" a inserirnos cada un de nós nun cadro famoso.

Continúa a formación.

Hoxe é o terceiro día de formación e xa nos imos coñecendo todos mellor. Ademais das aprendizaxes sobre IA e os seus diferentes usos e aplicacións para a aula, está sendo moi interesante coñecer a profesorado de tantos sistemas educativos diferentes. Estame permitindo coñecer outros sistemas organizativos, outros xeitos de traballar e outras maneiras de concibir os procesos de ensino. 💕

Hoxe comezamos a mañá traballando con Miro. Usamos esta app como taboleiro colaborativo para realizar diferentes actividades. Unha delas consistiu na elaboración dun storytelling sobre as nosas rutinas matinais. Para iso, usamos imaxes creadas con ChatGPT e Adobe Firefly. Despois, usando as ferramentas da aplicación, creamos unha presentación de maneira sinxela unindo todas as nosas rutinas. 👨👩

-   

      A continuación, traballamos con Goosechase. Con esta ferramenta fixemos unha actividade lúdica por equipos. Esta actividade permitiunos coñecer un pouco máis da historia da cidade, descubrir algunhas curiosidades de Florencia e, tamén, rirnos un montón! Aquí estamos facendo unha representación en vivo da famosa escultura "Rapto dunha Sabina", de Giambologna

Segundo día do curso.

 

Hoxe comezamos a mañá cun xogo de preguntas que nos axudou a introducirnos dun xeito lúdico no mundo dos "prompt" e de como melloralos para obter uns resultados óptimos cando usamos aplicacións de IA. 📱🤖

Rematada esta actividade, pasamos a traballar en grupos para deseñar mediante unha aplicación chamada GAMMA unha presentación na que reflexionamos sobre os pros e os contras do uso da IA.

Despois dun breve descanso, estivemos probando diferentes aplicacións (ChatGPT, Gemini, Perplexity, Copilot...) e usamos en todas elas o mesmo "prompt" para deseñar unha actividade de aula. Isto permitiunos comprobar cal delas satisfacía máis as nosas necesidades, cal nos daba uns resultados máis creativos... Cada un de nós presentou a súa actividade e a súa escolla. 😊😍

Primeiro día de curso en Florencia!

Hoxe comezou o curso de ChatGPT e outras aplicacións de IA para usar na aula. 

Florencia recibiume con sol e calor e o camiño ata o edificio onde está a escola, no centro da cidade, foi un paseo moi agradable.

Iniciamos a formación cun par de actividades para romper o xeo e coñecernos mellor entre as persoas que participamos nel. Hai docentes de Alemaña, da República Checa, de Croacia, de Grecia, de Portugal e de España. 🚎

Despois diso, presentamos cada un de nós o centro no que traballamos e os obxectivos básicos do noso programa Erasmus+ e xa nos puxemos mans aos ordenadores para comezar coa formación, empezando coa creación de imaxes. O profesor pediunos que ilustraramos nunha imaxe dun prato, aquilo que esperabamos do curso. Saíron resultados ben curiosos! 😜

O primeiro día rematou coa proba dun dos mellores xeados da cidade, recomendado polo profesor do curso, un auténtico experto da gastronomía italiana. Estaba boísimo!! 🍧🍦🍨

Despedímonos do Gymnasium Harilau

 

Para rematar o job shadowing, neste ultimo día aprendimos da organización do centro  e sorprendéronnos moitas cousas que son diferentes en relación ao noso instituto. Por exemplo:

-          Organización do horario durante a xornada laboral onde despois de cada sesión lectiva de 45 minutos tiñan pequenos descansos de entre 5 e 10 minutos.

-          Procedemento para o control da asistencia a través de libros de rexistro de forma manual, ao igual que o libro de actas na clase para anotar o que cada profesor/a vai traballando durante cada sesión.

-           As baixas ou faltas de profesorado deben ser asumida polo profesorado de garda xa que non envían substituta/o se non son baixas de máis dun mes.

-          No centro non hai orientador/a, existe unha figura que é un profesor/a que asume a materia de “skills” a través da que proporciona a orientación vocacional e tamén, soamente unha vez á semana unha psicóloga e unha traballadora social acuden ao centro para atender casos puntuais, realizar avaliacións psicopedagóxicas e atender ao alumnado con situacións sociais ou emocinais que o requiran.

-          O centro desenvolve un proxecto centrado nas Artes e nas Matemáticas, de feito ese día representantes do  proxecto acudiron a un Congreso a presentar as actividades do mesmo. Nas paredes do centro puidemos observar moitas das actividades realizadas que proporcionaban un toque de cor.

 

 

Segue a nosa aprendizaxe por observación

 

 

 Hoxe durante a nosa xornada de aprendizaxe por observación puidemos coñecer de cerca como funciona a organización da atención á diversidade e a organización da orientación persoal e vocacional.

Salientamos a importancia de traballar o autocoñecemento, os itinerarios académicos formativos, e o proceso de toma de decisións que neste sistema educativo se realiza a través dunha hora semanal, nunha materia denominada "skills" e non só de forma puntual como asume a orientación educativa en España. 

Na atención ao alumnado con necesidades educativas puidemos observar que, aínda tendo escasos medios e recursos, pódese compensar as dificultades de aprendizaxe coa profesionalidade, entusiasmo e paciencia do profesorado.

Job shadowing no Gymnasium Harilau

 Comezamos a nosa observación no instituto grego.

Neste primeiro día centramos a nosa atención en como se ensina o inglés neste centro educativo. Foi especialmente enriquecedor comprobar que se emprega un enfoque claramente comunicativo, no que se dá prioridade á interacción, á expresión oral e á comprensión en contextos reais, fronte ao ensino tradicional baseado na gramática. Chamou tamén a atención que o libro de texto utilizado non presenta a gramática de forma explícita nin illada; pola contra, esta apréndese a través da comprensión de textos e das audicións, o que permite que o alumnado interiorice as estruturas lingüísticas de maneira máis natural e contextualizada. As actividades estaban deseñadas para fomentar a participación activa, promovendo o uso espontáneo da lingua en situacións significativas. 

Este método non só fai as clases máis dinámicas e motivadoras, senón que tamén contribúe a desenvolver a autonomía e a confianza dos estudantes. De feito, un dos aspectos que máis nos chamou a atención foi o alto nivel oral que demostrou o alumnado: falaban inglés con fluidez, seguridade e boa pronunciación, o que reflicte o éxito desta metodoloxía centrada na comunicación auténtica.

 

Primeiro día en Tesalónica

 Hoxe comezou a aventura Erasmus+ en Tesalónica e foi un primeiro día cheo de emocións.

Dende a chegada ata esta vibrante cidade grega, o ambiente foi incríble. Recibimos unha cálida benvida por parte das profesoras do 1st Gymnasio Harilou.

ευχαριστώ

 

Curso sobre IA

 Aquí tedes o curso sobre chat GPT en Florencia