Un día inesquecible entre covas e natureza en Eslovaquia

 

Hoxe vivimos unha das xornadas máis completas e especiais da nosa experiencia Erasmus. Pola mañá desprazámonos ata a espectacular Demänovská jaskyňa slobody, considerada a cova máis visitada de Eslovaquia e un dos seus maiores tesouros naturais. Ao chegar, xa quedamos abraiadas coa paisaxe dos arredores, que estaban completamente nevados, creando unha estampa invernal impresionante e digna de postal.

Durante a visita, tivemos a oportunidade de adentrarnos nun mundo subterráneo fascinante, cheo de impresionantes formacións de estalactitas e estalagmitas, así como pequenos lagos de augas cristalinas que creaban unha paisaxe máxica. O percorrido, que incluíu nada menos que 913 escalóns, puxo a proba a nosa resistencia, pero tamén fixo que a experiencia fose aínda máis emocionante e gratificante.

Ao rematar a visita e xa de regreso, o autobús fixo unha parada nunha preciosa cascada situada en plena natureza. Alí puidemos descansar, respirar aire puro e desfrutar dun momento de calma, aproveitando tamén para facer fotografías e compartir impresións sobre todo o vivido ao longo do día.

Pola tarde, as estudantes tiveron tempo libre para pasar os seus últimos momentos coas familias de acollida. Foi unha oportunidade perfecta para reforzar os lazos creados durante a estancia, intercambiar recordos e comezar a despedirse dunha experiencia que, sen dúbida, deixará unha pegada inesquecible en todas elas.

Moitas grazas por todo! En dúas semanas vémonos de novo 🇸🇰🇪🇸

Último día no instituto.. pero seguimos! 🏔️

O noso último día no instituto de Dolný Kubín foi, sen dúbida, unha xornada moi especial, chea de aprendizaxes, reflexións e momentos para lembrar.

Comezamos a mañá cunha interesante discusión na aula de música sobre o consumismo, na que puidemos compartir opinións sobre os hábitos de consumo actuais e o seu impacto no medio ambiente. Foi un espazo moi enriquecedor no que reflexionamos sobre a importancia de adoptar estilos de vida máis sostibles e responsables.

A continuación, participamos nunha clase de inglés, o que nos permitiu vivir de primeira man o funcionamento das aulas no centro eslovaco. Ademais de practicar o idioma, foi unha oportunidade estupenda para intercambiar experiencias co alumnado local e coñecer mellor a súa realidade educativa. Comparamos o funcionamento de ambos institutos, creamos o noso instituto perfecto e falamos das culturas dos dous países.

Despois fixemos un obradoiro creativo moi especial, no que elaboramos marcos de fotos a partir de materiais reciclados, como foron os CDs. Esta actividade non só puxo a proba a nosa creatividade, senón que tamén reforzou a idea de reutilizar e dar unha segunda vida aos obxectos.

Para pechar a experiencia académica, celebramos a reunión final do proxecto, na que avaliamos todo o vivido ao longo da mobilidade. Foi un momento de reflexión compartida, no que puxemos en valor tanto os coñecementos adquiridos como as amizades creadas. Ademais, recibimos os nosos certificados de participación e uns recordos moi especiais desta experiencia Erasmus.

Xa pola tarde, chegou o momento de relaxarse e desfrutar xuntas cunha divertida sesión de bowling, seguida dunha cea de despedida na que compartimos risas, anécdotas e emocións. Foi a mellor maneira de pechar esta etapa no instituto.

Aínda así, a experiencia non remata aquí: mañá agárdanos unha nova aventura cunha excursión a unha cova, onde seguiremos descubrindo a contorna natural e compartindo momentos únicos. Sen dúbida, este Erasmus aínda nos ten preparadas máis sorpresas.

Levamos connosco moito máis ca aprendizaxes académicas: experiencias, amizades e recordos que nos acompañarán sempre. Grazas, Dolný Kubín!

🌍 3º día en Dolný Kubín: investigando sobre covas e medioambiente

O noso día comezou ás 08:30 no instituto de Dolný Kubín cunha intensa mañá de aprendizaxe e colaboración internacional. Ata as 12:00 participamos en diferentes presentacións, obradoiros e debates centrados nun tema moi interesante: as covas e a súa importancia para o medio ambiente.

Para comezar, asistimos a unha presentación na que descubrimos o valor ecolóxico das covas. Eslovaquia conta con máis de 7.000 covas rexistradas, moitas delas protexidas e algunhas incluídas no Patrimonio da Humanidade da UNESCO, como as covas do Karst eslovaco. Estes espazos naturais non só son impresionantes pola súa beleza, senón que tamén xogan un papel clave como refuxio de especies únicas, especialmente morcegos, e como indicadores da saúde ambiental.

Despois da presentación, pasamos á acción con dous obradoiros creativos. No primeiro, elaboramos maquetas de covas con materiais reciclados, o que nos fixo reflexionar sobre a importancia da reutilización e o coidado do planeta. 

No segundo, creamos carteis de concienciación ambiental, pensados para sensibilizar ao alumnado sobre os problemas ecolóxicos actuais.

Un dos momentos máis enriquecedores foi, sen dúbida, o traballo en grupos internacionais. As nosas alumnas colaboraron cos estudantes eslovacos, compartindo ideas, linguas e perspectivas diferentes. Este tipo de experiencias son o corazón do programa Erasmus: coñecer novas culturas, facer amizades e aprender uns dos outros máis alá das aulas.

Ás 12:00 asistimos a unha clase de inglés onde tamén tivemos a oportunidade de participar activamente. A sesión comezou cunha actividade de presentación guiada polo profesor, que axudou a crear un ambiente próximo e participativo. A continuación, o alumnado traballou en grupos nun quizz no que tiñan que relacionar vocabulario sobre o medio ambiente coas súas definicións, fomentando a colaboración e o uso da lingua inglesa. Despois completaron unha ficha con diferentes exercicios, e para rematar a clase fixeron un repaso final en círculo, no que cada estudante compartiu algo que aprendera durante a sesión. Foi unha dinámica moi interesante e participativa.

Despois do xantar, a xornada continuou cunha actividade máis lúdica: un animado partido de voleibol no ximnasio do instituto, que serviu para seguir fortalecendo lazos entre o alumnado nun ambiente distendido e divertido.

En resumo, foi un día completo no que combinamos aprendizaxe, creatividade e convivencia. Sen dúbida, experiencias como esta fan do Erasmus algo único e inesquecible 💙