🌍 3º día en Dolný Kubín: investigando sobre covas e medioambiente

O noso día comezou ás 08:30 no instituto de Dolný Kubín cunha intensa mañá de aprendizaxe e colaboración internacional. Ata as 12:00 participamos en diferentes presentacións, obradoiros e debates centrados nun tema moi interesante: as covas e a súa importancia para o medio ambiente.

Para comezar, asistimos a unha presentación na que descubrimos o valor ecolóxico das covas. Eslovaquia conta con máis de 7.000 covas rexistradas, moitas delas protexidas e algunhas incluídas no Patrimonio da Humanidade da UNESCO, como as covas do Karst eslovaco. Estes espazos naturais non só son impresionantes pola súa beleza, senón que tamén xogan un papel clave como refuxio de especies únicas, especialmente morcegos, e como indicadores da saúde ambiental.

Despois da presentación, pasamos á acción con dous obradoiros creativos. No primeiro, elaboramos maquetas de covas con materiais reciclados, o que nos fixo reflexionar sobre a importancia da reutilización e o coidado do planeta. 

No segundo, creamos carteis de concienciación ambiental, pensados para sensibilizar ao alumnado sobre os problemas ecolóxicos actuais.

Un dos momentos máis enriquecedores foi, sen dúbida, o traballo en grupos internacionais. As nosas alumnas colaboraron cos estudantes eslovacos, compartindo ideas, linguas e perspectivas diferentes. Este tipo de experiencias son o corazón do programa Erasmus: coñecer novas culturas, facer amizades e aprender uns dos outros máis alá das aulas.

Ás 12:00 asistimos a unha clase de inglés onde tamén tivemos a oportunidade de participar activamente. A sesión comezou cunha actividade de presentación guiada polo profesor, que axudou a crear un ambiente próximo e participativo. A continuación, o alumnado traballou en grupos nun quizz no que tiñan que relacionar vocabulario sobre o medio ambiente coas súas definicións, fomentando a colaboración e o uso da lingua inglesa. Despois completaron unha ficha con diferentes exercicios, e para rematar a clase fixeron un repaso final en círculo, no que cada estudante compartiu algo que aprendera durante a sesión. Foi unha dinámica moi interesante e participativa.

Despois do xantar, a xornada continuou cunha actividade máis lúdica: un animado partido de voleibol no ximnasio do instituto, que serviu para seguir fortalecendo lazos entre o alumnado nun ambiente distendido e divertido.

En resumo, foi un día completo no que combinamos aprendizaxe, creatividade e convivencia. Sen dúbida, experiencias como esta fan do Erasmus algo único e inesquecible 💙

Ciencia, paisaxes e convivencia

O terceiro día da nosa experiencia Erasmus en Eslovaquia comezou ás 8:30 da mañá, cunha actividade moi dinámica e enriquecedora. O alumnado identificou diferentes especies vexetais utilizando códigos QR e a aplicación PlantNet, combinando así o contacto directo coa natureza co uso das TIC. 

A continuación, recompilaron información sobre as plantas para completar un libro dixital deseñado previamente en Canva, fomentando tanto a investigación como a competencia dixital e o traballo en equipo.

A mañá continuou cunha proposta creativa: o deseño dun ecogarden mediante o programa GardenPlanner. Nesta actividade, puxeron en práctica conceptos de sostibilidade e planificación de espazos verdes, deixando voar a súa imaxinación mentres traballaban en equipo. Para rematar, tivemos a oportunidade de observar estomas de dúas plantas ao microscopio, unha experiencia fascinante.

Tras unha merecida comida no comedor do centro educativo, puxemos rumbo a Orava, onde visitamos o seu impresionante castelo. A subida pagou a pena: as vistas eran espectaculares e estivo chea de información histórica que nos permitiu coñecer mellor a cultura e o pasado da zona. Á volta, demos un agradable paseo pola cidade, desfrutando do seu ambiente.

Para poñer o broche de ouro ao día, reunímonos cos compañeiros do instituto na pista de hóckey sobre xeo. Alí, os estudantes eslovacos déronnos unhas clases básicas e tivemos a oportunidade de patinar todos xuntos, compartindo risas e momentos inesquecibles.

Sen dúbida, outro día fantástico que suma experiencias, aprendizaxes e lembranzas a este Erasmus.

Dovidenia!

Así vivimos o noso primeiro día no instituto de Dolný Kubín 🇸🇰

Hoxe foi o noso segundo día da nosa experiencia Erasmus en Dolný Kubín, e non poderiamos estar máis contentas coa acollida no instituto.

A xornada arrancou ás 9:30 cunha actividade de ice-breaker moi divertida para coñecernos mellor. Cada participante tiña que compartir a que lugar lle gustaría viaxar, unha habilidade que lle gustaría ter e unha curiosidade sobre si mesma. Foi unha forma perfecta de romper o xeo e empezar a crear conexións.

Despois, fixéronnos unha presentación sobre a cidade e o instituto, acompañada dun vídeo sobre Eslovaquia. Para rematar esta parte, puxeron a proba os nosos coñecementos cun Kahoot, que resultou tan entretido como interesante.

A continuación, participamos nun workshop de velas no que aprendemos sobre a importancia das abellas, os produtos que nos proporcionan e os seus beneficios para o medio ambiente. Chamounos moito a atención que a explicación correu a cargo dun neno de primaria, cun nivel de inglés excelente. Durante o obradoiro, elaboramos as nosas propias velas con cera e tamén un bálsamo labial.

O segundo workshop foi máis creativo: fixemos un lapiceiro reutilizando unha lata e empregando materiais reciclados, fomentando así a conciencia ambiental.

Ao rematar, tivemos un pequeno descanso que aproveitamos para coñecer mellor o instituto. Descubrimos algunhas curiosidades que nos sorprenderon: para entrar, todo o alumnado e a maioría do profesorado cambian o calzado por zapatillas.. Ademais, o centro conta cunha capela, onde rezan unha vez por semana e que está aberta para quen queira acudir en calquera momento.

Despois chegou a hora de comer no comedor do instituto e, pola tarde, demos un paseo para coñecer a cidade e os arredores, gozando das paisaxes e do ambiente.

Rematamos este primeiro día no instituto moi contentas, motivadas e con moitas ganas de seguir vivindo esta experiencia. Xa estamos desexando ver que nos depara mañá!

De Verín a Dolny Kubín

Comezamos a experiencia Erasmus despedíndonos da familia no IES Xesús Taboada Chivite e emprendo rumbo a Oporto, con moito sono... 

Clara, Carla, Chloe, Iria, Iris e Lecia, seis alumnas de 3º ESO, estaban desexando coller o avión que as levaría a súa aventura en Eslovaquia. 

Chegamos a Cracovia (Polonia) e dirixímonos hacia Dolny Kubín (Eslovaquia) vendo as súas fermosas paisaxes e aldeas. 4 países e 2853 km despois, estaban esperándonos as compañeiras eslovacas na Cirkevná spojená škola Dolny Kubín. 

Tras moitas horas de viaxe pasaron a súa primeira tarde coas súas familias. 

A descansar que mañá toca madrugaaar! :)